Ende pa konsensus politik për emrin e presidentit të ri të Kosovës
"Takimi shkoi në atmosferë konstruktive, mirëpo kur ka diçka të re do t'ju njoftojmë. Ende nuk i kemi zgjidhjet mirëpo do t'ju njoftojmë së shpejti", tha Kurti
Kryeministri i Kosovës, Albin Kurti ka zhvilluar edhe një takim sot me kreun e Lidhjes Demokratike të Kosovës (LDK), Lumir Abdixhiku, ku pas takimit tha se nuk ka ende konsensus politik për çështjen e presidentit, transmeton Anadolu.
Kurti tha se takimi me Abdixhikun ka qenë ne atmosferë konstruktive.
"Takimi shkoi në atmosferë konstruktive, mirëpo kur ka diçka të re do t'ju njoftojmë. Ende nuk i kemi zgjidhjet mirëpo do t'ju njoftojmë së shpejti", tha Kurti.
Kurti dhe Abdixhiku u takuan tre herë me temë kryesore për diskutimin e çështjes së presidentit, por pa rezultate konkrete.
Sipas raportimeve të mediave në Kosovë, kryeministri Kurti pas takimit që pati dje me kryetarin e LDK-së, Abdixhiku, ka zhvilluar edhe një takim me presidenten Vjosa Osmani.
Jozyrtarisht bëhet e ditur se tema të këtij takimi ishin opsionet konkrete për tejkalimin e ngërçit politik, përfshirë koordinimin institucional dhe hapat e fundit para skadimit të afatit kushtetues.
Partitë politike parlamentare ende nuk kanë arritur marrëveshje për të siguruar 80 votat e nevojshme. Mandati i presidentes Osmani skadon më 4 prill ndërsa afati për zgjedhjen e presidentit të ri është 5 marsi, në të kundërtën, zgjedhjet e reja parlamentare duhet të mbahen brenda 45 ditësh.
