Trump: Rrëzimi i avionit amerikan nuk do të ndikojë në negociatat me Iranin
Trump refuzoi të komentojë detaje rreth operacionit të kërkim-shpëtimit pas incidentit, duke e cilësuar atë si çështje të ndjeshme ushtarake
Presidenti amerikan, Donald Trump, ka deklaruar se rrëzimi i një avioni luftarak amerikan nuk do të ndikojë në negociatat e vazhdueshme me Iranin, transmeton Anadolu.
Në një intervistë të shkurtër telefonike me NBC News, Trump refuzoi të komentojë detaje rreth operacionit të kërkim-shpëtimit pas incidentit, duke e cilësuar atë si çështje të ndjeshme ushtarake.
Presidenti amerikan shprehu pakënaqësi me raportimet mediatike lidhur me situatën, e cila lidhet me përpjekjet për gjetjen e anëtarëve të ekuipazhit pasi avioni u rrëzua.
I pyetur nëse zhvillimet do të ndikonin në përpjekjet diplomatike me Iranin, Trump e hodhi poshtë këtë mundësi.
“Jo, aspak. Jo, është luftë. Ne jemi në luftë”, tha Trump për NBC News.
Më herët, zëdhënësja e Shtëpisë së Bardhë, Karoline Leavitt, tha se Trump ishte informuar për rrëzimin e një avioni luftarak amerikan mbi Iran, i identifikuar më pas si F-15E Strike Eagle.
